ကေလနိယသွားတောလား
အပိုင်း (၉) နိဂုံး
တွဲလက်ကြည်ဖြူ ဖေးမကူ
ကေလနိယတက္ကသိုလ်၌ ပညာသင်နှစ်တစ်ခုတွင် စာသင်ကာလအားဖြင့် အပိုင်းသုံးရှိရာ၊ ပထမပိုင်းတွင် သင်ကြားသည့်ဘာသာရပ်များလုံးကို အထူးပြုနှင့်သာမန် (Major & Minor)ဟု ခွဲခြားမနေရပဲ အားလုံးကိုတက်ရောက်ရပါသည်။ သို့မှသာ ရွေးချယ်ရမည့်ဘာသာများကို မိမိတို့စိတ်တိုင်းကျ ရွေးချယ်နိူင်မည်ဖြစ်သည်။ ထိုပထမပိုင်းစာသင်ကာလ၏ ကုန်ကာနီးနောက်ဆုံး အပတ်တွင် မိမိတို့စိတ်တိုင်းကျ ရွေးချယ်ထားသော ဘာသာရပ်များကို မိမိတို့ကျောင်းသား နံပါတ်နှင့်တကွ လျှေက်လွှာတွင်ဖြည့်စွက်ပြီး တက္ကသိုလ်သို့ပြန်လည်တင်သွင်းရပါသည်။
ထိုဘာသာရပ်များကို အပြီးသတ်မရွေးချယ်ခင် ကေလနိယတက္ကသိုလ်တွင် တက်ရောက်နေကြကုန်သော မြန်မာရဟန်းတော်များသည် မကုဋကျောင်းတော်သို့ လာရောက်ကာ မည်သည့်ဘာသာရပ်များကို ရွေးချယ်သင့်သည် ပယ်သင့်သည်ဆိုတာနှင့်ပတ်သက်၍ အတွေ့ကြုံရှိသော ကျောင်းသားဟောင်းများ၏ အကြံပေးချက်များရယူကာ ရွေးချယ်ဆုံးဖြတ်ကြပါသည်။ ဤသည်မှာ ရှေးအစဉ်ဆက် မြန်မာရဟန်းတော်များ လုပ်ကိုင်ခဲ့သော အစဉ်လာကောင်းတွေထဲက တစ်ခုဖြစ်ပါသည်။
ထိုနောက်တွင်တော့ အဆိုပါဘာသာရပ်ဆွေးနွေးပွဲတွင်ပင် သက်ဆိုင်ရာဘာသာရပ်အသီးသီး၏ အကြောင်းအရာ(Topic) များကို တာဝန်ယူရေးသားနိူင်မည့် အင်္ဂလိပ်နှင့် ဆိုင်ရာဘာသာရပ်ကို ကျွမ်းကျင်စွာရေးသားနိုင်စွမ်းသူများကို ရွေးချယ်ကြပါသည်။ ဘာသာရပ်ရှစ်ခုအတွက် တာဝန်ယူရေးသားမည့်သူ ရှစ်ဦးကို ရွေးချယ်ကြရပါသည်။ ကျန်သောသူများက ထွက်ရှိလာသော ဘာသာရပ်ဆိုင်ရာ အကြောင်းရာ(Topic)များကို အလွယ်တကူ ဖတ်မှတ်လေ့လာနိူင်ပါသည်။ ဤနည်းအားဖြင့် ခက်ခဲလှသော အမ်အေတန်းကို မြန်မာရဟန်းတော်များမှာ လွယ်လွယ်ကူကူနှင့်ပင် နှစ်ချင်းပေါက်ကျော်လွှားနိူင်ခဲ့ကြပါသည်။
မိမိတစ်ဦးတည်း၏ အစွမ်းအစနှင့်ဆိုရပါမူ အမ်အေတန်းကို တစ်နှစ်တည်းဖြင့်ပြီးဆုံးရန် အတော်ပင် ခက်ခဲပေလိမ့်မည်။ “ကြီးလျှင်မှီ၊ ငယ်လျှင်ချီဆို”သည့်အတိုင်း မှီသင့်သူကမှီ၍ ချီသင့်သူက ချီခဲ့ကြသောကြောင့် အမ်အေအောင်ပန်းကို အလွယ်နှင့်လှမ်းနိူင်ခဲ့ကြသည်။ “သုခံ သံဃဿ သာမဂ္ဂီ= အဖွဲ့စည်းများ (ရဟန်းတော်များ) ညီညွတ်ကြခြင်းသည် ချမ်းသာ၏။ “သမဂ္ဂါနံ တပေါ သုခေါ= ညီညွတ်ကြကုန်သော သူတို့၏လုပ်ငန်းသည် (အောင်မြင်၏) ချမ်းသာ၏”ဟု ဓမ္မပဒတွင် ဘုရားရှင်က မိန့်တော်မူခဲ့ပါသည်။
ပညာသင်နှစ် ဒုတိယပိုင်းတွင် မိမိရေးသားမည့်စာတမ်းအကျဉ်းချုပ် (Essay Proposal) ကို တက္ကသိုလ်၏ သက်ဆိုင်ရာဌာနကို တင်သွင်းရပါသည်။ ဆိုင်ရာဆရာ (Supervisor) ၏ အတည်ပြုချက် လက်မှတ်ကိုရလျှင် အဆိုပါစာတမ်းကို ဆက်လက်ရေးသားရပါသည်။ စာသင်ကာလ တတိယပိုင်း၏ နောက်ဆုံးအပတ်မှ စာမေးပွဲမဖြေခင် တစ်ပတ်အလိုအတွင်း စာတမ်းများကို အပြီးသတ် တင်သွင်းရပါသည်။ စာတမ်းမတင်သွင်းသူများမှာ နောက်ဆုံးစာမေးပွဲကြီးကို ဖြေဆိုခွင့်မရပေ။
နောက်ဆုံးစာမေးပွဲကြီးမဖြေဆိုခင် တစ်လအလိုမှာ ကျောင်းပိတ်ပေးပါသည်။ စာမေးပွဲဖြေခွင့် လက်မှတ်များနှင့်ဘာသာရပ်များ၊ ဖြေဆိုရမည့်အချိန်ဇယားများကို တက္ကသိုလ်စာတိုက်မှတစ်ဆင့် မိမိတို့ဆိုင်ရာလိပ်စာအတိုင်း အရောက်ပေးပို့ပါသည်။ ဖြေဆိုရမည့်ဘာသာရပ်များနှင့် မိမိရွေးချယ်ခဲ့သည့် ဘာသာရပ်များ လွဲချော်နေလျှင် တက္ကသိုလ်၏ စာမေးပွဲဆိုင်ရာဌာနကို အချိန်မှီပြန် လည်အကြောင်းကြားရပါသည်။ စာမေးပွဲကြီး၏နောက်ဆုံးနေ့တွင် တစ်နှစ်တာအတူတက်ခဲ့ကြသော သူငယ်ချင်းများနှင့် စာသင်ကြားပေးခဲ့သည့် ဆရာများအားလုံး စုပေါင်းကာ မှတ်တမ်းဓာတ်ပုံ အတူတကွရိုက်ကြပါသည်။ ထိုနောက် မိတ်ဆက်ပွဲဖြင့် တက္ကသိုလ်စာသင်နှစ်ကို ဖွင့်လှစ်ခဲ့သလို၊ နူတ်ဆက်ပွဲဖြင့်သာ စာသင်နှစ်တစ်ခုကို ပျော်ရွှင်ရွှင်အဆုံးသတ်ခဲ့ပါတော့သည်။
ကေလနိယတက္ကသိုတွင် မြန်မာနိူင်ငံရှိ ဒေသအသီးသီးမှ ရဟန်းတော်များ လာရောက်တက်ရောက်ကြပါသည်။ နေရာခြင်းမတူကြသလို၊ လူမျိုးချင်းလည်းကွဲပြားကြပါသည်။ ထိုအတူ တက္ကသိုလ်ကို လာရောက်ခဲ့ရာလမ်းကြောင်းချင်းလည်းမတူညီကြပါ။ ဖြတ်သန်းခဲ့ရာ ဘ၀ပေးအခြေနေများ မတူညီခဲ့သည့်အလျှောက် အချို့မှာ လွယ်လင့်တကူရောက်ရှိလာခဲ့ကြပြီး၊ အချို့မှာမူ ခက်ခက်ခဲခဲရုန်းကန်ပြီးမှ ရောက်လာခဲ့ကြရပေသည်။ မည်သို့ဆိုစေ သီရိလင်္ကာရောက် မြန်မာရဟန်းတော်များမှာ တစ်လှေတည်းစီး တစ်ခရီးတည်းသွာများ အဖြစ်မှတ်ယူကာ အချင်းချင်းဖေးမ ကူညီခဲ့ကြသည်။
မိမိတို့ အမျိုးမျိုးဆင်းရဲပင်ပမ်းခံကာ သင်ကြားခဲ့သောပညာများဖြင့် မိမိဇာတိမြို့ရွာများကို ဦးတည်ထားကာ နိူင်ငံအတိုင်းတာ တစ်ကမ္ဘာလုံးအတိုင်းထာထိ စစ်မှန်သော ဗုဒ္ဓတရားတော်များကို ကျယ်ကျယ်ပြန့်ပြန့် ညွှန်ကြားပြသပေးနိူင်ပါစေ၊ ဗုဒ္ဓ၏လမ်းစဉ်ကိုလိုက်ကာ အများအကျိုးပြု၊ သာသနာအကျိုးပြုလုပ်ငန်းများ ထိထိရောက်ဖြစ်စေ အုပ်တစ်ချပ်သဲတစ်ပွင့်ပမာဖြစ်စေ မဆုတ်မနစ် ကြိုးစားအားထုတ်နိူင်ပါစေဟု ဆန္ဒပြုလိုက်ရပါတော့သည်။ သို့မှသာ မိမိတို့အား ပစ္စည်းလေးပါးဖြင့် ယုံယုံကြည်ကြည် ဖြူဖြူစင်စင် လှူဒါန်းထောက်ပံ့ခဲ့ကြသည့် ဒကာ/ ဒကာများကို စစ်မှန်သောကျေးဇူးဆပ်ရာလည်းဖြစ်ပေလိမ့်မည်။
မေတ္တာဖြင့်-
အရှင်ဥတ္တမာနန္ဒ
(ကေလနိယတက္ကသိုလ်)
February 17, 2011 (10:38 am)
*****
No response to “၂၀၁၁-နေ့စွဲများ”
Post a Comment